الله يخليكم يا اوزيين لا تزعلووون مني

[الرور]

السلام عليكم اخواني وخواتي اليوم موضوعي مب مجرد مسجات واهداءات بس موضوعي هي لكل مشترك في القسم الرائع قسم المسجات يمكن اكون غلطانه بس يا ليت كل واحد فينا يوقف لحظه مع نفسه ويشوف الشي اللي يقدمه عشان يتم هذا القسم قسم رائع ومميز ومرجع للناس كلها اللي تحب المسجات


معظم المسجات الموجوده في القسم من اعضاء مميزين واعضاء جدد يبشرون بمستقبل رائع

بس النقطه قمت اشوف تكرار وايد وها يدل على شو الصراحه ما ادري ويمكن باقي الاعضاء لحظوا هاي الشي بس ما يريدون يحرجون حد بس الصراحه الموضوع لو نسوي عليه كنترول في البدايه يكون احسن يعني ممكن افهم انه حد ينزل مسجات قديمه بس الغريب انه ينزل احيانا مسجات نزلت في المنتدى قبلها باسبوع اوحتى اسبوعين وهي وجهة نظر ارجو انكم لا تزعلون مني لكني من غيرتي على القسم اريده دوم كامل مافيه نقصان وبعدين في نقطه ثانيه في بعض المسجات والله انه الواحد ما يقدر حتى يقراها لنفسه فكيف بيطرشها حق اهله او اصدقائه وفي النهايه نحن هني لتبادل المسجات الراقيه والنكت الخفيفه

انا في النهايه وحده منكم وادريبكم الكل يحب المنتدى ومتعصبين في حبه واسفه اسفه اسفه اذا تعديت حدودي وتدخلت وتحياتي وحبي للجميع

[أسيرة قلب]

الروووووووووووور ( boundce )..

قويــــــــــــــــــــــــــــــــه ...

بس موضوع حلو ... و أنا وياج في الكلام اللي قلتيه ...

و أحب أضيف ... نحن ما نحب انه نجرح الأعضاء أبدا ... و نقول انه المسجات قديمه ..

و لو انه نحاول نحن نفهم العضو أو العضوه الشي هذا ... من خلال جملة في نهايه الرد ( نحن بانتظار الجديد ) ..

و أنا أريد أعيد الجمله اللي قلتها قبل ... انه مشكلة المسجات القديمه نحن ما نقدر نتحكم فيها ..

لأنه قد تكون بالنسبة لصاحب المسجات جديده أما بالنسبة لأشخاص غير تكون قديمه ..

فالموضوع اذا يكون معقد ....

بس أحيان ... العضو يكون عارف انه المسج هذا قديم .. و قراه سابقا في موضوع عضو آخر .. و يرد و يحط المسج نفسه ... فشو الفايده من هالشي هذا ؟؟؟

الرور .... تسلمين حبيبتي لفتح النقاش في هذا الموضوع ... و اتمنى انا المشرفه سحر العيون .. تعطي الموضوع المجال للنقاش ... و أنا شخصيا حابه اني اسمع راي كل عضو و عضوة موجودين في القسم ...

ألف شكر .... و سامحوني على الإطاله ...

[electric_brain]

hello everyone

well .. as long as u were talkin' about that kind of subject

i noticed that some people post poem as sms and we know that u can't send these poems to anyone via sms .. it will take more than 100 sms for just 1 poem

but .. i agree, u can't control this, coz some users don't know what is new n' whats is old .. maybe they just received these msgs and wanna share it with other OZQ8 member

Regards
Electric_Brain

[شموع الدار]

الرور
مرحبا حبيتي boundce
ومشكوره عالموضوع الحلو :mad:
وصح لسانج ولسان الغاليه أسوره على
كل الكلام

وأما بالنسبه لمشكلة المسجات القديمه حبوبه
ماله حل لأن في أعضاء يلقون هذي المسجات
جديده بالنسبه لهم فلا يوجد له حل

وأما بالنسبه للمسجات غير لائقه فهذي تكون
من مسئوليتي مشرفة القسم ومطلو ب منه
أن ترفع المواضيع الغيرلائقه من القسم والذي يكون
به ألفاظ بذيئه

ويفترض من جميع رواد قسم الرسائل القصيره
أن نستمع لأرائهم وأقتراحاتهم بهذا الموضوع
المميز

وألف شكر لج حبيبتي boundceعلى
الموضوع ولاتخافين ماحدا راح يزعل
من كلمة الحق

والرجاء من جميع الأعضاء والذين يريدون
التعليق على هذا الموضوع الرجاء منهم
أن يكون التعليق بصفه عامه بدون تحديد
أسماء أو مواضيع

ويعطيكي ألف ألف عافيه ولاخلا و
لاعدم منج يارب

وتحياتي لج

[طيف الحزن]

الرور
مرحبا حبيتي
ومشكوره عالموضوع الحلو
وصح لسانج ولسان الغاليه أسوره على
كل الكلام
ويعطيج العافية يالغلا

[ضناني الشوق]

الرور
وليش الزعل اختي الغاليه انتي قلتي عين الصواب
وكلامك كله صح مافيه اي شي يزعل
فيه مسجات مكرره ومسجات غير مقبوله
واميرتنا سحر العيون ماقصرت
وماتبي تزعل احد منها
والمفروض ان العضو قبل ماينزل اي مسج يتاكد من الموضوع
وكل اللي قلتيه يدل على شغله بسيطه
ان العضو مايشوف المسجات اللي بالموضوع بس يرد على الموضوع
يعني هو ماقرأ السجات بس رد مشكور على المسجات
وان شاء الله اي موضوع او مسجات مكرره تنقل للارشيف
مكانها الطبيعي وبدون زعل

[يا غايب]

الرور المشكله يالغاليه نفس المسجات يتغير اسلوبها

مثلا اليوم المسج وينك حبيبي
بكره المسج حبيبي راح وتركني

المسجات صعب يعمل عليها كنترول فيه المسجات القديمه والقديمه مره تعرف
والواضح لجؤنا هالايام للمسجات الشعريه لانها اصبحت الاقرب للشخص
وتصل اليه مسج ونجي ننزلها مع المتميزين هنا

موضوع المسجات جديده او قديمه صعب الحكم فيها
لان المسج القديم يتجدد باسلوب ثاني والمعنى واحد

وبالنسبه للمسجات والردود المخله
نتمنى من الشخص يكون رقيب نفسه قبل لا يكون فيه احد رقيب عليه
كلنا هنا اخوان وما نرضى بالغلط بحق اي احد متواجد معنا

دمتي متميزه وصاحبة مبدء جميل يالرور



يا غايب ,,,

[se7eral3yoon]

عليكم السلام ..
الرور ..
تسلمين اختي على حرصج على المنتدى والقسم بشكل خاص ،،
انا راح ادخل في الموضوع على طول ..
يمكن تشوفوني مقصرة مع القسم الفترة الاخيرة ..
اولا لان المواضيع قاعده تنزل بالهبل ..
ثانيا ان العضو الواحد ينزل اكثر من موضوعين
بدون لا يراعي قوانين القسم ،،
ثالثا انا عندي امتحانات ولا راضيه تخلص
ووقتي محدود للمنتدى ،،
بالنسبة للمسجات الغير لائقه .. تلاقين صاحب الموضوع مسوي copy وبعدين paste بالقسم بدون لا يقرا الموضوع .. او انه بالنسبة له هالاشياء عاادي ..
والرد على هذي المواضيع .. بشكرا والا تسلم على المسجات اكيد انه ماقراها بس يبي يزيد مشاركاته ..
وانا اقرا كل مسج بكل موضوع حتى لو كان شطووله عشان اكون محاسبه على كل ردودي
واكون عارفه على شنو راده .. ياليت الاعضاء يقرون المسجات قبل لا يردون بشكرا ..
اما سالفة المسجات المكررة وهذي الي بتجيب لي الضغط ان العضو ينزل الموضوع ذاته الي منزل قبل يومين من عضو ثاني .. وانا بدوري احط له رابط الموضوع القديم وانقله للارشيف .. ياليت هذا يقنعه ... لكن للاسف مايقدرون ويدزون لي رسالة ليش نقلتي موضوعنا !!
وبعدين مافيها شي لو قلتوا باسلوب حلو لصاحب الموضوع انه المسجات قديمه ونحن بانتظار الجديد ..
واي مسجات قديمه راح يكون مكانها الارشيف
الا يمكن تشوفون اعضاء جدد وحاطين مسجات قديمه .. انا ماانقلها الارشيف
كتشجيع لهم ..
تحياتي لكم .. وياليت يكون في تعاون بينا

[ريــهام TS]

كفت ووفت مشرفتنا الغاليه (سحر العيون)

الرور والله انج موب سهله ماشاء الله عليج

وهالمساله جدا كانت مضايقتني بس شو اسوى مااحب اجرح حد

باي رد موب لايق واقول شكرا

وتحياتي لج

ريهام ss

[Nab(5)eel]

الــــــــــرور

كلامك على العين والراس

وبلعكس حنى معاكي قلباً وقالباً

والي مو عاجبه يعله مايربح

[تفا حه]

بصراحه معاج حق الرور في كل كلمه قلتيها

وانا مع اسوره احنا ما نحب احد ياخذ على خاطرنا بس نحاول نبين له ونقول في انتظار الجديد

والذكي يفهمها

وانا معاج نبي القسم يكون مميز ورائع بكل ما فيه من اعضاء ومسجات ومواضيع مميزه

يعطيج العافيه عيوني

[أسيرة قلب]

سحـــــــــــر العيون ... صــــــــــح لسانج حبيبتي ....

و نحن مقدرين جهودج ... و نعرف انج قد ما تقدرين تحاولين انج تكونين متواجده في قسمج ....

و مسألة الاشراف واضح انه مب مسهله أبدا ....

أتمنى انا نسمع راي الأعضاء الجدد ..... (( كطرف ثاني في الموضوع )) ..

شكرا

[الرور]

اسووووور

هلا وغلا يا عيوني ويسلمو على الرد اللي كمل ما قلته بس الملاحظه هي ما اعتقد انه اذا كان النقد بناء ممكن حد يزعل لكن النقد لمجر النقد والنقد للتجريح ها شي يضايق ومرفوض قلبا وقالبا المساله هني انه يوم نشوف مثلا موضوع يديد وفيه اكثر عن مسج لعضو قدم المسجات هاي في موضوعه ومن فتره قصيره هاي الشي لازم ينحط له حد
يعني ما اعتقد حد يرضى انه يكون منزل موضوع وعقب كم يوم يشوف حد منزل المسجات نفسها نفسها حتى مب مغير فيها حرف نحن راعي شعور ناس بس في ناس اللي كانت سباقه في وضع المسج محد راعى شعورها ويوم ها العضو يشوفنا يالسين نمدح مسج هو منزلنه قبل تحز في خاطره حتى لو مارمس صح ولا انا غلطانه

على العموم للحديث بقيه وانا وايد سعيد بايجابيتج معاي وكلنا ايد وحده لاوز متميز ورائع

[رباح الشمري]

http://www.arab7.com/up/file/1080740152.jpg

رباح وهديل


يسلموووون عليج

ويقولون

ايه والله كلامج صحيح وعلى العين والراس

أختي (( الرور ))

تقبلي مني أجمل تحيه من رباح وهديل

[الرور]

electric_brain

Thank you for your feed back most of the messages could be poem and I do not think there is problem with that unless it's too long otherwise I think its fine

In regards to old messages, we can understand that but we cannot understand that some of the member’s copy others messages and paste them in there article which is not acceptable

Many thanks

[الرور]

برجع لكم بعد شوي

[ولـ العنـود ـه]

الرور
مشكوره حبيبتي على كلامك
واحنا مو من عادتنا ان نزعل
بالعكس الصراحة ماتزعل
وتسلمين يالغالية
بس انه اللي اشوفه من المسجات
في بعضها مكرر بس اقلبها مرت علي بالجوال مو بالمنتدى يعني قديمة
بس ماشفتها مكتوبة بالمنتدى
وانه بعد ارد على بعض الاعضاء صج قديمة لكنها حلوه
علشان العضو مايزعل مني

والمسجات صارت نفس الاسلوب والمعنى مافيها تغير بالمره
خصوصا المسجات الغرامية

لان الاعضاء عندهم مسجات بس مايدرون انها مكتوبة بالمنتدى
وماشاءالله الاعضاء في تزايد مستمر
والله يزيدهم إنشاءالله

تقبلي تحياتي يالغالية

[الرور]

شموع الدار

هلا والله بشمعة المنتدى يا جماعه كل اريد اقوله انه المسجات نفسها قامت تتكر بالمنتدى وها ظاهره لازم كلنا نتساعد عسب نوقفها والمسجات القديمة لازم تنقل للارشيف اما بالنسبة للمسجات الغير لائقه وهي لله الحمد مب كثيره وو المشرفه الصراحه ما تقصر بس في نفس الوقت هي عليها ضغط فنحن كاعضاء لازم نساعدها ويوم نشوف الخطاء ونساعدها يعني ممكن هي تقول حق شخص المسجات قديمه بس حد قبلها في الموضوع قال الله الصراحه مسجات وايد حلوه فكاتب الموضوع بيعتقد ان المشرفه متقصده انها اتضايقه فنحن بعد علينا مسؤوليه في ردودنا

للموضوع بقيه

[الرور]

طيف الحزن
هلاا طيف تسلمين على المرور الخفيف حبيتي

[الرور]

ضناني الشوق
استاذي ضناني الحمد لله انه محد زعل الصراحه كنت وايد خايف ومتردده لكن الحمد لله قدرت افتح موضوع شاغل كل الاعضاء بدون استثناء
ومثل ما قلت الحين المسؤوليه تقع علينا كلنا فرد فرد يوم نرد ونقول برافو لازم نكون صادقين فيها عشان الغلط ما يتكرر
يسلمو مره ثانيه على دعمك المتواصل لي ولجميع الاوزيين

[الرور]

يا غايب

هلاا والله بالطله يا غايب ولفت نظري شي في كلامك صحيح في بعض المسجات تتكرر باسلوب ثاني بس حتى هاي ارحم من اللي ينقل المسج copy & paste

ونحن مع التجدد مواضيع الحب والشوق والعتاب من قديم الازل ولين اليوم لو انتم نكتب نكتشف انه بعد في كلام ممكن ينقال وحب شخص عن شخص يفرق ويعطيك ابداع جديد وشعور جميل يعني ممكن تقرا مليون مسج حب بس كل واحد ممتميز كل واحده له طعم وذوق غير عن يكون وياليت يكون ها الشي حاصل عندنا

[الرور]

se7eral3yoon
وعليكم السلام ورحمة الله وبركاته
في البدايه الله يعطيج الف عافيه على المجهود الكبير اللي تبذلينه والله يوفقج في دراستج يا رب ترا هاي اهم من اشي ثاني
وشكرا لاتاحة الفرصه لي في ها الموضوع للنقاش
والمساله مب مسالة انج مقصره نحن كلنا مشتركين في الغلط بطريقه او باخرى
وبالنسبة للاعضاء اليداد في المنتدى مافيها شي لو نلفت نظره عادي تحصل بالعكس المفروض انه يكون عنده اصرار ويحاول ويحاول لين ينجح لانه عمره النجاح ماي من اول موضوع وعلى فكرة انا اول موضوع لي في اوز حذف لان المسجات كانت قديمه بس انا كنت عضوه يديده بس ها الشي خلاني اقرا المواضيع كلها عشان اعرف شو المستوى الموجود
وبعدين شوي شوي قدرت اكون نجاح بسيط وسعيده فيه وشوي شوي يعني كل واحد بيدخل بيحط في اليوم موضوعين ولا ثلااث ومحتاوهم خالي من اي تميز عمره مابينج وعمره ما بيوصل لقلوب الناس وخير الكلام ما قل ودل
والف الف شكر يا اميرتنا المميزه على تفاعلج معاي ونحن كلنا يد وحده وقلوبنا انشاء الله دوم مع بعض

[الرور]

ريــهام Ts

هلا والله يا الطيبه تولهت عليج انتي مثل القمر تظهرين مره بالشهر
حبوبه بسالج لو اخوج غش في الامتحان بتسكتين ولا بتكلميه بطريقه يفهم انه ها الشي غلط ولا لازم يعتمد على عمره ؟؟؟؟؟؟

[الرور]

Nab(5)eel

اخوي نيبل يسلمو على دعمك لي وتواصلك لا خلينا منك ياربي

[الرور]

اطيب تفاحه

حبيتي وانا معاج انتي واسوور بس لازم نعرف كيف ناخذ موقف ونقول لا للنقل من نفس المنتدى

[الرور]

الى رباح واحلى هديل في الدنيا كلها

يسلمو عيوني ولا خلينا من طلتك علينا وسلام خاص للعروسه هديل الله يحفظها لكم يارب

[الرور]

وله العنود

في البدايه شكرا على المشاركه انا معاج في كل كلمة قلتيها بس انا قصدي هني يوم يتم نقل مسجات ونكرر مسجات هي اصلا موجوده في القسم

وتقبلي فائق تحياتي وحبي

[ليل مالا آخر]

الكلام جميل لكن الفعل دائما" صعب!!!!
أشكرا كلامكم الصريح ودائما" الحلو مايكمل
وعندي ملاحظه بسيطه:قبل فتره عضو من الأعضاء الكرام نزل جزء من مسجاتي والمشكله نفس العنوان ونفس المسجات من غير حتي ذكر أسمي
وبثواني خذه تعبي بثواني والشي اللي أبقوله هو تتعب وتكتب ويجي غيريك بكل أسف
وياخذ مجهودك !!!!!!
صحيح هذا مو موضوعنا لكن كل عضو يحاول يضيف شي بهذا القسم ولكل عضو أشتهاده ما ألوم عضو كرر المسجات ورجع القديم وخلاه جديد والكل عضو ذوق
وشكرا على كلامكم الوافي والكافي بنفس الوقت والشافي
وأتمنى من كل قلبي يصبح هذا القسم(( شمس ))
وحتى ما أنسى شكرا (( الرور)) شكر خاص وأرجوا أن ما أكون أثقلت عليكم

[أسيرة قلب]

الرور ....

ما اتوقعت انج بتحطين رد لكل عضو منا .... و انا والله ارتحت يوم فتحتي الموضوع هذا ..

لأنه بالفعل ... ما شاء الله المواضيع بدت تزيد في القسم و مع هالشي .. المسجات المكررة و القديمه أيضا بدت تزيد في المواضيع ...

لكن (( و تم كلمه لكن موجوده )) معظم الأعضاء اللي نشوف لهم مواضيع هالأيام يداد ..

اتعرفين كيف العضو يكون متحمس في البدايه ... و يحط موضوع ...

فكيف أنا بقدر أقوله في ويهه .... مسجاتك قديمه جي سيده ... أنا عن نفسي و شخصيا ما بقدر أقوله هالشي ...

مثل ما قلت .. أنا اتبع طريقه وحدة .. الا و هي جملة (( نحن في انتظار الجديد )) .. عاد هو عليه يفهم ..

ما أحب اني أحبط العضو و هو توه في بدايته .... بالعكس لازم نشجعه بكم كلمه حلوة ... و عقب اتي الجملة اللي قلتها .. مثلا(( مسجاتك حلوة ... موضوعك حلو .. و الجديد نحن في انتظاره ))..

و أعيد أكرر ... سالفة اليديد و القديم ... ما نقدر نتحكم فيها ... أبدا ....

و بالنسبة للنقل ... فهذا الشي الغلط ... و أنا من رايي ... انه لو أي عضو حس انه هالمسجات منقوله من موضوعه ... خلاص يكلم العضو ولا يسكت ... لأنه لو سكت .... فيستمر على هالشي ..

و هذا اللي ما نباه يستوي في القسم ... حرام شخص يتعب .. و يروح عضو ثاني ياخذ هذا التعب و يعرضه على الجاهز ...

بالتأكيد كلنا نسعى لتقدم أوز .. و انه يكون مميز في كل شي ....

و أنا بصراحه عندي كلمه .. أحب اني أقولها .. و اتمنى انه محد يزعل مني .. بس وجهة نظر يعني ..

(( أنا دخلت المنتدى و سجلت فيه في شهر 11 .... و أنا بصراحه أشوف انه مواضيع الوقت هاك .. كانت أحسن من المواضيع الحين ... يعني في أشخاص مميزين و تميزهم يوم عن يوم يالس يظهر .. و هاييل مستواهم معروف ما اتكلم عنه .. لكن كثرت المواضيع الحين .. وللأسف المسجات اللي فيها مكررة و قديمه ... الا قلة قليله من المواضيع ))

أتمنى محد يزعل ..... و شكرا

[الرور]

ليل مالا اخر

اولا شكر على واجب ثانيا انا مقدره شعورك وكيف الاحساس يوم حد ياخذ مجهودك ويلصقه بنفسه وراي انك علنا تعلن انه هاي المسجات لك وانت منزلنها في المنتدى وحط الرابط ولو كل واحد منا بيسوي ها شي محد بيسوا الشي ها مره ثانيه وحياك الله اخوي والموضوع موضوعك لو عندك اي اضافات او اي شي ثاني مضايقنك

وحياك الله اخوي

[الرور]

اسوووور

وانا فرحت بتفاعلج وتفاعل الاخوه مع الموضوع وها الشي يدل ان الكل متضايق وحاط في خاطره ومحد يبى يرمس ولو كلو واحد بيسكت عن حق له هاي مشكله انا معاج ان عملية التحكم بالمسجات القديمه صعب انا معاج بس تخيلي انتي بالذات يمكن انتبهتي ان واحد او اكثر من مسج كنتي منزلته في احد مواضيعج و شفنها في موضوع في القسم بعدها بفتره مب طويله ومحد تكلم ونفسي الشي معاي ومع ومع ومع ومع بس ها الشي الصراحه يضايق و انا اول وحده من يوم وساير ما بسكت لاني يوم اسكت اراعي شعور شخص وانسى ان في شخص ثاني اتأذى صح ولا لا اسيره ؟؟؟


واريد اضيف تمويه ياليت ما تفهموني غلط انا مب ضد الناس اليديده بالعكس انا دايما اشجع الاعضاء الجدد واكون معاهم وفكرة تجديد الدماء في المنتدى ظاهرة صحية

الموضوع مب متعلق بعضو يديد لا لان بعض الاعضاء (القدامى) يسووووووون نفس الحركات فهي مب سالفة يديد وا جديم

على العموم منكم السموحه طولت عليج

سوال ليش استغربتي اني رديت على الاعضاء ؟؟؟؟؟؟؟

تحياتي وحبي اختج المحبه الرور

[Guest46]

ياهلا باالاخت الغاليه
الرور
وياهلا في موضوعك
وبصراحه موضوعك اكثر من رائع
ويستحق كل أحترام وتقدير
واتمنى هذا الموضوع عندما طرحتيه يأتي بنتيجة ترضي جميع الاطراف المعنيه
وانا أيد كل كلمه كتبتيها وكل ماكنتي تقصدينه وبالفعل اصبحت ظاهره لدى بعض الاعضاء القدماء والجدد .. كتابة مواضيعهم من دون الاطلاع على مواضيع الاعضاء في القسم
ولكن الجدد قد يكون لهم العذر
حيث انه جديد ولايعلم او مطلع على المواضيع الموجوده داخل القسم والمواضيع كثيره
ولو كان يعلم سوف يعلم عن القليل
ولكن العضو القديم ماهو عذره وانا حصلت معي مرارا وتكرارا
بعض الاعضاء القدماء وليس جدد تشارك بمسجاتي
وانا مشارك بها وهي لازالت تأتي ردود عليها
ولكن كنت دائما اخبرهم بذالك وبدون مجامله
لان الموضوع كان يخصني شخصيا
واكثر من مره نبهة اعضاء قدماء ومتميزين وقلت لهم يوجد من مسجاتكم موجوده داخل موضوع العضو الفلاني وعليك بحذفها لانه هو من سبقك بتنزيلها ..
اما بخصوص الاعضاء الجدد
كل ماعلينا نحن هو التنبيه بذالك بطريقه لايتضايق منها كاتب الموضوع
وعدم المجامله وليس المقصود هو تجريحه او التسبب له في احباطه
وهو في اول مشاركاته وانا اقصد طبعا الاعضاء الجدد
ويجب علينا ايضا من جميع الاعضاء القدماء التي (( تميز )) المواضيع المتكرره وتعلم عن مافيه داخل القسم
عدم مجاملة اي عضو عندما يكون موضوعه اومسجاته متكرره
وفي حاله ترك رده العضو داخل موضوعه وبقوله بكلمات المعتاده مثل
لاتبخل علينا بالجديد او نتظر منك الجديد اومسجات مكرره او..........الخ
يجب على باقي الاعضاء المتميزين بالردود والذين لهم بصمة داخل القسم
والذين هم دائما يردون على مواضيع الاعضاء
عدم الرد على الموضوع حتى لايرفع ويكفي عضو اوعضوين ينبهون كاتب الموضوع
(وانا اقصد في هذا الكلام الاعضاء الاقدماء والجدد) في حالة تكرار مسجاتهم
وايضا ظاهرة الردود من قبل بعض الاعضاء على المواضيع من غير ان يطلعون عن ماكتب فيها وهذا بالطبع لايمكن التحكم فيه او فرض السيطر على الاعضاء
لان هذا الشي غير مقبول والكل حر في نفسه
واذا كان يريد العضو مجرد اضافة مشاركه او مجامله العضو صاحب الموضوع
بالرد عليه..نحن ماذا سوف يطلع في ايدينا ؟
واما بخصوص المواضيع الغير لآئقه والمسجات الغير مقبوله
حلها بسيط وهو رفعها من القسم من قبل المشرفين وعدم مجاملة كاتبها حتى لايعيدها بالمره القادمه .... ولايوجد مشكله في ذالك

بالمختصر المفيد
اذا نريد ان نميز هذا القسم بمواضيعه
اولا يجب علينا ان نبتعد عن المجامله المبالغ فيه ونعطي كل موضوع حقه في االشكر والردود
وثانيا يجب ان نميز المواضيع عن بعض حتى لاتصبح جميع المواضيع داخل القسم متشابه
ونفس الميزان والمعيار
يعني لايصبح المسجات الجديده والمسجات المتكرره والمسجات الغير لائقه متشابه وتتعامل بالمثل ولايوجد تميز بينهم
بكل صراحه لا يوجد تميز في هذا القسم ولايوجد تقدير لذالك ولوكان موجود هذا الشي
لاكان الكل اصبح يبحث عن التميز والبروز ويبعد عن التكرار حتى يصل للذين وصلو قبله
وابسط مثال على ذالك ...مالفرق بين من يتعب ويجتهد ومن يبحث عن الكلمة الجميله
وهو يرى موضوعه يتعامل اسوة بالمواضيع المتكرره والغير لائقه
فاياعزيتي الرور
موضوعك رائع والنقاش فيه اروع عندما يأتي بنتيجه ايجابيه ومرضيه للجميع
ولكن الخلل ليس بالمواضيع المتكرره او الغير لائقه او الاعضاء الجدد او القدماء
ولكن الخلل موجود في اماكن اخرى ويجب على الكل مناقشته
اذا كنتم تبحثون وتريدون تميز قسمك
وطبعا لااقصد شخص معين ولكن لاتصبو نقاش موضوعكم على امور سطحيه ومن السهل ان نتتاركها ويوجد امور جوهريه هي من تريد النقاس بها وصدقيني ياعزيزتي
عندما تنحل الامور الجوهريه صدقيني سوف يتميز القسم وانتي لاتشعرين
ويلبس ثوب آخر غير ثوبه الأن ..............

فاكل الشكر لك ياعزيزتي
واشكر اخواني واخواتي الاعضاء
واشكر كل من سبقني في هذا الموضوع ووضعه رده
والله يعطيكم الف عافيه
وتقبلو مني اجمل تحيه
اخوكم
عبدالله المعيصب

[أسيرة قلب]

الرور ... ان شاء الله بحاول اني افهم العضو الموضوع هذا بطرق ثانيه ... وبعيد عن المجاملات..

و بالنسبة لسؤالج ... هههههه والله ما عندي اجابة ...

[وحده قمر]

غاليتي الرووووووووووووور


محد يزعل منج لان كلامج صحيح وماعليه اقصووووووووور


وصحيح ان في بعض الاشخاااااااص يسوووووون كوبي وبيست بدون مايقرون أصلا المسجات وبعضهااااا تكون غير لائقة وبعضهااااااا تكون جدا قديمة ومكرره وكل اللي نقدر انقووووووله لاشخاص غاليين عليناااااا ونقدر مشاركتهم معانا بالقسم

((بانتظار الجديد))

شكرا عزيزتي على طرح الموضوع لانه بالفعل موضوع مهم


يعطيج الف عافية وعساج دوم ع القوة

[الرور]

هلا اخوي عبدالله اعتذر عن التاخر بالرد بس التاخير اكيد ما كان مقصود

وبالنسبة لكلامك عن تعقيبك على الموضوع فانا معاك ميه في الميه لكن التنفيذ هو المطلوب وعضو مثلك له وزنه في القسم المفروض انك بعد اتساعد مافيها شي اذا قلنا حق عضو يديد او قديم ان المسجات مكرره واذا انا قلت انها مكرره ويت انت قلت يسلمو مسجات روعه العضو بيتحرا اني متقصده اني ازعله فيا اننا كلنا نساعد بعض او الاحسن اني اكتفي بعدم الرد على اي موضوع فيه مسجات مكرره نحن احيانا وانا كلامي مب على المسجات القديمه بس بل على السطو على اعمال الاخرين اعضاء في المنتدى منزلين موضوع من اسبوع اوحتى يومين وتحصل الحبيب يااخذه المسجات وينزلها تحت اسمه وتحصل الاعضاء الباقين في ردودهم الله روعه مسجات في منتهى الجمال وهكذا والحال ما بتعدل الا لو الكل قرر يقول لا للنقل من زملائك لا للتكرار لا لمسجات التافه


على العموم اتمنى ان كل عضو معانا هني يفهم انه النقد مب موجه لشخص بذاته بل نحن نوجه النقد البناء الزين تراه زين و الشين لازم ينقال عنه شين حتى لوانا نزلت شي وما يازلكم ما بزعل لو قلتو الرور ترا مسجاتج مب بالمستوى المطلوب وبفهم انه الغلط هذا لازم اني مااكرره وحاول اني اعدل لكن في كل مره بنقول على المسجات ممتازه يعني محد بتعلم من اخطاءه
وكلنا يد وحده

تحياتي

[الرور]

اسووووور


بنشوف بترومين ولا واذا ما رمتي ترا مخالفه بتيج

[الرور]

وحد قمر

يا مرحبا ملاييين اسمحيلي يا الغلا اتاخرت وايد وايد عليج بالرد اعذريني الغاليه والله مشغوله الفتره هاي بطريقه لا تتخيلينها السموحه عاد كله ولا القمر

تسلمين حبيبتي على المرور الرائع وانا معاج يا قمر المشكله في ناس ما تقرا اصلا وفي ناس تقرا وتستهبل

على العموم بمجهودنا كلنا مع بعض انشاء الله كل شي بيكون للافضل

وتسلمين يا عمري