مذكرات طالب جامعي (( ينصح بفصل الاتصال ))

[الفاضي]

اول شي الموضوع منقول من ساحة الاقلاع

ثاني شي افصل الاتصال واستمتع


هذي مذكرات كتبتها على مدى 4 سنوات لي بالجامعه .. وعرضت بعضها بالاقلاع .. فقلت ورا ما احط الباقي هنا بموضوع كودكم تستفيدون من مذكراتي الجامعية اللي ودي أقوله اني مانقحت ولاوحدة مخليها زي ماهي .. عشان تشوفون المصالة .. وعاد انتبهوا لشركة الاتصالات



زلـــــــــــــــــــــــــب

الحمدلله رب العالمين قبلت بالجامعة وسووا لي افراد القبيلة حفلة مطنطنة لها اول مالها آخر وفرحت فرح مهوب بسيط لاني اول واحد من قريتنا يدخل الجامعة كل هذي الافكار استرجعتها وانا قاعد افطر في الجامعة بعد ماستلمت الجدول وكنت اكل بسرعة عشان الحق المحاضرة لكن لقيت ابوحسين خويي من ايام الثانوي وقال : هاه ابو عبدالله شفت المباراة امس .رديت عليه ايه نعم قال: ويش رايك بهدف اللاعب احمد شكمان قلت له : صراحة انا مشغول الحين عندي محاضرة بعد المحاضرة نتكلم قال لي : يارجال زلب قلت له : براسك (يعني تم)وزلبت

زلب شعور لذيذ يحس فيه الطالب من اول يوم يدعس فيه على عتبة الجامعة ويكتشف حلاوته مع الايام وللتزليب علاقة طردية مع ثقل دم المادة او الدكتور فكلما ثقل دم المادة كلما زاد التزليب وبرضه للتزليب عوامل من اهمهما السواليف المهمة والمباحثات الخطيرة في امور الكورة والفطيرة

المهم اني زلبت المحاضرة وكم احسست اني رجل لي كلمتي في الجامعة اذا ماابغى احضر المحاضرة مااحضر مو مشكلة عشان كذا استفيدوا من هالتجربة وزلبوا

بعد كذا جيت ابالحق المحاضرة اللي بعدها ولقيت علي ولد حارة ولد عمتي وقال لي : وينك يالقطوع ما نشوفك ولانسمع صوتك قلت والله بالدنيا مشغولين قال وش علوم الجامعة قلت انا اسف ابتأخر كذا على المحاضرة قال زلب ورديت براسك

للمرة الثانية اللي احس فيها بكياني في الجامعة وصدق الاكادميين اللي قالوا ان الجامعة هي صانعة شخصية الطالب ومن اهم موادها التزليب

بعد كذا استحيت اني اجي الجامعة ومااحضر اي محاضرة فتلثمت ودخلت للقاعة بس عند الباب لقيت عبدالرحمن صديق الطفولة وقمنا نتذاكر ايام الطفولة وقال لي الكلمة المشهورة زلب

مشت الايام وانا على هالمنوال ازلب وازلب بس لكل شيء اذا ماتم نقصان ذاك اليوم مافي مباريات ولافي احد من زمان ماشفته توهقت كيف بازلب بدون عوامل التزليب وقام يتصبب العرق وقعدت افكر كيف بازلب فانا متورط وفي الاخير لقيت الحل

كان الحل اني اكلم اهلي من كباين الجامعة والله وبسطت معاهم وسولفت طوال اليوم

قرب الفصل الدراسي على النهاية وكذلك دوام التزليب قرب يخلص وذاك اليوم قريت عند مسجل الكلية اسماء المزلبين اقصد المحرومين وطبعا كنت على راس القائمة والحمدلله اني قدرت ارفع راس عيلتي واطلع الاول على المزلبين وانا اكيد راح اكرم بجائزة المزلب الاول على مستوى الجامعة بس الله يوفق



الــــــدوام للّه

أنام الساعة 3 فجرا ،يدق المنبه الساعة 7,45 صباحا مع العلم أن المحاضرات تبدأ الساعة 8,00 أستيقظ وأنا أقول لنفسي : (أووه ما الذي أوقظني باكرا اليوم لا بورك فيك ولا من صنعك أيها المنبه الصنديد )….أحاول إغلاقه ولكن دون جدوى فأحمله بغضب لأرميه على الجدار لترتض عظامه رضا -وأقول أفصح عن نسبك أيها الفارس لعله ينجيك مني أنا أبا الفوارس -أوه عفوا إني متأثر قليلا بسيرة أبا الفوارس عنترة ابن شداد،المهم وأتجه أكرمكم الله إلى الحمام لأغسل وجهي ولكني أفاجأ بأن وجهي نظيف فأرشه بالماء رشه ،ثم أنظر لأسناني حتى أفرشها بالمعجون فأجدها نظيفة ناصعة البياض من كثر التفريش ليلا بسيجارات المارلبورو الأحمر فأقرر سريعا ألا أغسلها لأني سأتأخر عن المحاضرة الأولى،أخرج مسرعا إلى الثوب وأسحب منه السواك وألبسه وأنا أنزل على الدرج والشماغ على الكتف .

السيارة….. تحتاج على الأقل خمس دقائق للتسخين-هذا إذا كان هناك سيارة-ومن ثم أشغلها وإلى الجامعة على عجل ،أصل والساعة الثامنة وعشر دقائق أجد المواقف مكتظة بالسيارات فأحشرها بين السيارات بأي مكان شبه فاضي ثم أركض إلى مبنى الكلية.

هنا أعزائي تأتي أولى العقبات في يومي فكيف سأدخل المحاضرة بعد حضور الدكتور المهم يجب أن أكون جاهزا بنصبة-متخرش الميّه على قول إخواننا المصريون-فأتنفس بقوة لأقول للدكتور: (بنشر عليه الكفر في نص الطريق).وأدخل إلى المحاضرة وتمر المحاضرة تلو المحاضرة وأنا نائم .



مستشار على رتبة ثرثار

جالس في اول يوم من ايام الدراسة للسنة الثانية لي طبعا انا طالب منتظم فانا ماعمري من دخلت الجامعة وقد اخلفت بموعد الفطور المهم جلس جنبي واحد تفرست في وجهه واكتشفت ان هذه الشخصية ماتعرف شي عن الجامعة وطبعا فراستي ماتخطي الا في ماندر المهم سلمت عليهو رحبت فيه وعزمته على الفطور وقعدت اسولف له : انت شكلك جديد على الجامعة .قال : تقدر تقول

بس جا وقتها الحين الوقت اللي يحب كل طالب جامعي انه يقضيه الا وهي الفلسفة قمت اتفلسف عليه واقوله شوف الجامعة مو سهلة الجامعة صعبة راحت ايام الدلع والولع خلاص صرت رجال والمفروض انك تفهم مصلحتك عشان كذا الدكاترة والمعيدين مايسألونك عن الغياب لا على طول ينبسطون بتغييبك

رد علي : بس انا ......قلت له : انا عارف انك طالب مجد ومجتهد لكن لازم تقابل حاجات تغثك من وقت لثاني من الدكاترة والمعيدين قام وقال : بس انا ......قلت له : افهم يااخي نظام الجامعة ولاتضيع اي مادة عليك مايمنع انك تزلب ببعض الحاضرات انا عارف انه في دكاترة ومعيدين بيغثونك بس استحمل

قام الرجال يناظر بنظرة غاضبة ويقول : بس انا.....قلت له : ماتبسبس ليش واسمع الكلام المظبوط اهم حاجة في المحاضرة انك تطنش الدكتور باي طريقة وان ناظر بوجهك عطيه قفاك اما المعيد فلا تعطيه وجه وان كلمك بالكرسي وان قال واجب لاتجيبه ترى المعيد مايملك الاعشر درجات لا والدكتور يتحكم بها يعني باختصار المعيد طرطور بيد الدكتور والطلاب

صرخ بوجهي : اسكت شوي ياخوي وقام من على الكرسي فلحقته وقلت له : طيب وش كنت تبي تقول قال : كنت باقول لك بس انا معيد مو طالب مستجد



سنة اولى جامعه

خلصت اولى جامعة وطلعت بعدة فوائد ونقاط قررت ان اضعها بين اخي المزلب – اقصد الطالب - :

الساعات المكتبية : هي التعريف الحقيقي لكلمة سراب فمامفي امل انك تلقى دكتور او محضار او معيد او حق البوفيه موجود في الساعات المكتبية المحددة ، وبعض علماء التزليب عرفوها بأنها الاسلوب الامثل لتعليم الطلاب فنون الصبر والانتظار حتى بعد ماتتزوج ماتتوهق وتعرف كيف تحتري المدام عند السوق او العرس وخلافه .
المحاضرة : هو ذلك الوقت الذي تجلس وتهوجس فيه عن احلامك وطموحاتك وماذا سوف يكون معدلك عندما تحصل على ممتاز مرتفع او مقبول او حتى الرسوب مع اني ماقد سمعت بكلمة ممتاز مرتفع بالجامعة بس وش تبي تقول طبعا هذا في حالة الحضور وهذا امر قليل.
الدكتور : هو ذلك الشخص المعصوم الذي لايخطيء ولا يعلم سوى الصواب ولايجمع العلم غيره لانه هو احسن واحد هنا ، وعرفه علماء اخرون من علماء التزليب انه ذلك الشخص الذي يهزيء ويتمهزأ بالطالب ويعتبره هو ومافي قدمه واحد ، والصنف الثالث من علماء التزليب عرفوه بانه ذلك الشخص الذي يقول الممتاز لله فلا يجوز لاحد مصادرة حق الله والجيد جدا له فلايجوز ان تصادره انت ووجهك والجيد هو اعلى مايمكنك الحصول عليه وهناك تعريفات اخرى نضيفها في حلقات اخرى لكلمة دكتور.
المعيد : هو ذلك الشخص الذي ليس بيده ولادرجة وفوق كذا ينفخ عليك ويهريك كوزات وواجبات وخلافه وبعدين يلقيك ظهره .
المكتبة : سامعين عن هالاسم بس ويييييين مدري



المكــــــــافأة

صحيت في ذالك اليوم الممطر - أخس يالمنفلوطي - وقتحت البوك حقي واذا بي - حقوق الطبع لهذه الكلمة محفوظة لعبدالله بالخير وداوود حسين ولي فقط واذا بيقط معنا أحد ترا عايدي - أجده فاضي ومابوه دراهم فصحت بنفسي ويحك ياأبو الشباب - والله ماني سارقها من نزار قباني - وين راحت فلوسك سكلتك أمك - ناقلها من فيلم عادل أمام الارهاب والكباب شف كيف التوثيق العلمي تعلموا مني - وقعدت أفكر وأشحن تفكيري ولم أجد الشاحن وين ذهبت فلوسي ؟ أنا مواعد الشباب أعزمهم اليوم على الغدا والله التوهيقة وفجأة دق علي أبو حسين وقال : هاه معتفسوه كيف حالك ؟
قلت له : تمام وش تبي تراي مو رايق ؟ قال أبي البشارة
قلت له : على أيش ؟ بشر ؟
قال : ابشرك نزلت المكافأت .
<------ من سمعت الخبر وانا كذا

من قال هالخبر وأنا ناط لاعلى شي ومادريت الا أني عالق فوق الثريا وقعدت ساعة حتى نزلت وأمغط للجامعة أبي مكافأتي وأدعس ويقفوني المرور وما ارد وهم طردي وراي بس بدري للدورية كيف تلحقني وأنا معي ميتين ال عنابي وجنوط نيكل توني جايبها من العربة وادخل الجامعة وقاعد أركض وأشوف العالم تركض وأنا وراهم والعالم كلها تركض طلاب يركضون دكاترة يركضون معيدين يركضون وش السالفة ؟ ما أحد رد وأشوف العالم تركض وأنا معاهم والحق على مسئول المكافأت ابو علي ياني ما أواطنه كلما شافني قال البطاقة والقى أني ناسيها بس اليوم ما يمديه أنا جايب البطاقة الجامعية والاحوال والرخصة وتعريف من الشغالة .
عشان ماتصير له حجة وأوصل عند الخباز أقصد عند حق المكافأت وفيه سرى طوييييل حاولت اساقط عليهم بس ماخلوني بس خويكم صبور وأمسك سرى وكل شوي يجيني واحد ويقول تكفى انا محاضرتي بعد شوي ومستعجل ممكن أسير قدامك ؟ وأنا من الطفاقة أقوله تفضل وش دعوة ياخوي أنت احق مني وأنا على هالمنوال - لقصيري النظر على هالمنوال مو نوال عشان ماندخل في سين وجيم - المهم جو عشرة ومشيتهم يوم جا الاحدعش وقال لي نفس الكلام صحت بوجهه وانا بعد عندي محاضرات ولازم أزلبها تحسبني فاضي يوم أنه زعل
وقال : يا بوي لاتذلنا بمكانك .
ويروح للي قدامي ويستأذن منه ويوافق له بس عشان يقهرني وأقعد أحتري المكافأة الى الساعة أربع العصر واوصل عند ابو علي ويوم شافني ولاني اخر واحد ضحك وقال : تعال بكرة خلص الدوام .
أقوله : يابن الحلال أنا لحالي تكفى مشني
. بس هو يبيهامن الله وعيا وأجي من بكرة من الساعة ستة الصباح و أبو علي ما داوم الى احدعش ويالله الله أخذ منه المكافأة وأروح للبنك بأصرف وألقى جارنا حسين هو اللي أصرف واحاكي عمري ( مجنون عايدي ) هذا جارنا وبيمشينا على طول .
ويوم وصلني الدور قالي بطاقة الجامعة أعطيته يقول بطاقة الاحوال أعطيته يوم خربت معاه وجا يقول لي وقد أنفرجت اساريره - اللي يبي يعرف معنى هالكلمة يراجع قصة الكونت دي مونت كريستو ولا تسألوني وش ذا ترا ما ادري معي ولد خالتي هو اللي قالي عليها - المهم وقال لي فيه غلط
قلت وش غلطه ياخوي
قال أسمك المعتفس وفي الشيك معتفس .
قلت له : طيب
قال : بالبطاقة فيه ألف لام وفي الشيك مافيه ألف لام
قلت ياخوي لاتدقق
قال : أسف القانون قانون
ثم ثم ثم ثم ثم ثم ثم ثم ثم ثم ثم
<------------- هذا ملخص لحالتي خلال ذيك الفترة

وأروح من بكرة للجامعة والقى المسئول عن الشيكات جعبمص ( والله من الاسماء )
قال لي تعال بعد 6 أشهر لاخلصت مدة الشيك
قلت طيب والحين
قال دبر عمرك
قلت له ما أقدر
قال وبكرة اذا ألغوا المكافأت أيش بتسوي ؟
قلت ما أدري
قال أجل أقلب وجهك .
بعدها طلعت من الجامعة وأنا في حالة من التطفير لايعلم بها الا الله لهذا أود اعلامكم أني أستقب تبراعاتكم على الحساب الموحد 5555- ترا ماعندي واسطة لاتقولون شلون طلعته مميز

ملاحظة مهمة :

لكل الوجيه اللي ماقدرت اجيبهن معي بالقصة بالله لاتزعلون مني باحاول أجيبكم بقصص ثانية



التـــــــرم الصيفي

الصيف قرب والسفر حان طاريه

استرجعت - ملاحظة لكل المقلعين استرجعت وليس رجعت - ذكرياتي يوم سمعت هالاغنية وتذكرت الترم الصيفي
<----------- من زين الذكرى والله

سمعت شباب عند البوفيه وأنا قاعد أزلب محاضرة 104 سلم يقولون هاه يافلان بتقدم صيفي والثاني يقول ان شاء الله بأقدم يوم سمعتهم يقولون كذا قلت لازم اقدم معاهم
<---------- أحسبها سفرة بالصيف
المهم أني رحت لخويي أبو حسين وقلت له ويش رايك نقدم صيفي قال لي قدام - لكل من لايعرف هذه الكلمة يراجع المرجع اليسير في كلام أبو المقلعين طبعة الاقلاع لعام 2001 - طبعا أنا يوم أني رحت أقدم الصيفي .
سألت مسجل كليتنا وش ذا الصيفي قال تميس
قلت هاه وشلون تميز سمعت طلاب يقولون أنه سفرة
قال يالغبي هذا ترم تدرس فيه اذا انك متأخر بمواد
قلت آها .
أنا قلت آها ومادريت الى ملف يمشي مليون يضرب بوجهي ماعلينا بالموضوع .
طبعا أنا مو دافور بس عندي مواد مزلبها وزلبتني عشان كذا قلت لازم الحقها بهالصيف وأقدم صيفي.

لسة ماخلصت السالفة ايش فيكم مستعجلين المهم قدمت على الصيفي وبدت الدراسة والدنيا حر ماكملت أسبوع الا جاني خويي ابو حسين وقال لي تراي حذفت الصيفي وبأروح لسوريا هنا حر وبأروح اتبرد
<---------أبوك يالبراد :eek:

قلت أجل بأروح أحذف وأسافر معاك
قال رح لوكيل الكلية واحذف الترم
قلت له تمام
مغطت - راجع المرجع الذي تم ذكره في أعلى الصفحة - ورحت لوكيل الكلية ودخلت عليه وأنا أرفس الباب برجلي قوة وبدون ما ادري الاقي ,وجهي بوجه عميد الكلية
قلت له طال عمرك نبي نحذف الصيفي
قال لي ليش
قلت والله نبي نسافر لسورياو....
أنا بس قلت سوريا والرجال قلب أحمر وقام يزاعق : تسافر لسوريا وأنا اقعد هنا بالحر معصي
هو قال معصي وأنا أعصب وأرغي وأزبد
وأقوله : ليش ؟
قال : بس
صرخت بوجهه : طيب لو سمحت تكفى وقعدت أحببه قال بعد أن أمعن تفكيره - قوية الكلمة وجت في الصميم وش بعد هالصميم يووووووووه -
قال : ممكن في حالة وحدة بس قلت له : وش هي تكفى أنا بعرضك - شكر خاص للفضائية المصرية على اعارتي هالكلمة - قال : أنك تسوي حادث أو عاهة ماتقدر معها تكمل الصيفي . قلت : بس هذي قال أيه قلت طيب أبشر بسعدك .
بعد ماطلعت من مكتب طويل العمر وكيل كليتي قعدت أندب حظي أيش هالكلية اللي وكيلها هذا
وقلت في نفسي : انا لازم أسوي بحالي عاهة مستديمة عشان احذف الترم الصيفي وقعدت أطر - على وزن أشحذ - تفكيري حتى لقيت الفكرة مالي الا أسوي ذاك الحادث الاليم عشان أصاب بالعاهة.
طلعت من الجامعة وقدت - كلمة موسوعية متميزة تمتاز بصفات عديدة لكني نسيتها -سيارتي مسرعا والقى ذيك الصبة - مو سندويش فلافل يالجوعانين - وقلت أصدمها وادخل بوسط الصبة وتنقلب السيارة أربع قلبات وادخل على طريق الملك فهد وأنا مقلوب وتسحب السيارة وانا أضحك ومبسوط وأغني أغنية
حذفنا والله وفقنا وهذا الترم جحدنا أغنية احلام المشهورة وفي الاخير القى ذيك الزحمة وادخل فيهم وأنا مبسوط وأنزل من السيارة فرحان واحد يقول حمدلله على السلامة وأنا اقوله بس دور معي عاهات وانت ساكت وقعد يدور معي مالقينا شي ادور بدرج السيارة بجيوبي مافي شي وقعدت اصيح الناس قالوا دموع الفرح وأنا أعيط - مأخوذة من عادل امام - مقرود والله مقرود حتى بالعاهات مقرود ويضيق صدري وأروح لشركة ذيب ( مهيب دعاية ولاشي ) واستاجر وانيت عنابي الرفرف اللي ورا مدهون بمعجون موديل 77 وأطلع فيه البر
<------- أسوي زي المصارية لازعلوا راحوا النيل امحق نيل عندنا .
واطلع البر واقعد أصيح وأحس أن صورة الوكيل تطلع لي وهو قاعد يضحك ويقول : اخر موعد للحذف بعد يومين دور لنفسك عاهة بسرعة . وأقعد أعيط وأعيط - راجعوا المصدر السابق - وأشغل الاف ام ويطلع لي ذاك المطرب ويغني
معتفس من أرض مكناس وسط الشوارع يدور عن عاهة مالقاها
الين ماخلص وأنا اعيط وبعدين جا أبو نورة ويقول
لا لا لاتضايقونه المعتفس لاتضايقونه
والله تسلم يا أبو نورة ورفع من معنوياتي ويجي بعدهم ذاك المطرب الخايس جواد ويقول
أحذفك وانت ماتدري أحذفك وأنت ناسيني احذفك يا بعد ناسي
وكملها بعدهم كاظم يغني ويقول
قولي حذفتك كي أروح لسوريا فبغير حذفك لا أكون مسافرا
ويجيني علي بن محمد ويقول
تحط بجدولي سلم
وتقولي أدرس بلا الم
وتقولي حل
ويلاه
وشلون أحل
ويلاه
المهم صكيت الرادو - يسمونه بالعربي المذياع - ونزلت أناظر البر ولمعت في رأسي فكرة حتى أن كل من شاف راسي يحسبه لمبة وقررت اسويها عشان احذف الصيفي بها...قلت لازم أسويهاركبت الوانيت ودقيت سلف واذا بي لايوجد وقود(واحد يعدل الاخطاء) أيش أسوي ؟ قعدت أفكر وأفكر ومازلت اقدح بالتفكير وأسدل الليل ظلامه كما يسدل الشرشف على الفراش الدنيا ليل وماعندي بنزين وش اسوي ما أعرف قعدت ادور في البر وانا اتخيل أصوات ذيابة وثعابين وتطلع صورة مشخوط وهو يضحك وقاعد يقول الا على طاري الصيفي ترا بكرة أخر موعد للحذف . وقعد يضحك ويضحك وانا أصيح المهم مادريت الا جيب عراوي وقف فجأة جمبي قلت بس جت الفزعة يوم نزل راعي الجيب ولا هي حرمة
قالت : وش علامك ؟
قلت لها : والله انا هنا من ساعة وماعندي بنزين
قالت : لا اله الا الله تعال أركب معاي أنا أوديك لمضاربنا وأعشيك وتمرح عندنا ومن أصبح افلح
قلت لها : يا بنت الناس ان مانيب حق مضاربات عاد ضحكت ومسكتني مع ثوبي وشالتني ورمتني بالسيارة( الى كل التعبانين شوفوا ارقة كيف) المهم وراحت لخيمة أبوها ويوم شافني ابوها صرخ وقال : حي هالضيف ياهلا ومسهلا أقلط ياخوي .
قعدت أناظر زي الدلخ في الارض وانا أقول مافي ملاقط يالشيخ
قال : أقلط هنا بالمجلس ياولد العم .( مأثرة بي المسلسلات البدوية )
المهم دخلت عنده بالمجلس وقال :وش سالفتك انت ؟ جيت بأتكلم رد علي (زي مذيعين غصب واحد مايعطونك فرصة ترد) تعشى أول وبعدين نتكلم تعشيت فلقد أحضروا لي وليمة من الحاشيات فلقد ذبحوا لي حاشيين وهذا ان دل فانه يدل على ... أيش فين صرت زي حقين الحماية الفطرية المهم أكلت أنا والشايب الحواشي وقلت له : الله يجزى بنتك خير والله كنت بأموت
قال : أفا وانا أبو رزان تتكلم عن بنتي
قلت : لا مو هذا القصد
قال : اجل وش قصدك
قلت له :أنا سالفتي ... وحكيته السالفة من طق طق للسلام عليكم
قال لي : هذا مشخوط رجال مهوب سنع بالحيل مرة ( حتى هم يتابعون طاش ما طاش )
وقال: ألحين أروح معاك واطخه
قلت له :لا طخني أنا أنا أبغى عاهة
قال : افا وأنا أبو ليليان مابقى الا هذا نطخ الضيف أقول يالاخو تبيت الليلة وبكرة بنتي جانيت توصلك للرياض ولو أشوفك الصبح هنيه ترى أذبحك ذبحي للحواشي
قلت له سم
طلع الصباح وركبت مع بنته جانيت وودتني للرياض الين أقرب محطة
وقالت : صرف عمرك وقفت في المحطة
وقلت لها شكرا يا حلوة
قالت : أفا أنا حلوة وصرخت تجمعوا علي باكستانية المحطة(وكلكم علم وشو الباكستانين) وضربوني ضرب ماقد أنضربته منذ زمن وأنا أضحك وأقول : أيه بعد تكفون عاهة يوم شافوني اضحك وقفوا ضرب وكلهم يقولون : أيس فيه هزا مزنون قعدت أترجاهم يكملون ضرب مارضوا قعدت أسبهم وألعن فيهمما احد رد علي مسكت عصا وجيت أضرب واحد تجمعوا وضربوني وكسروا يدي وصارت تتدودل(يعني طاحت) فرحت وقمت أركض طلع لي مشخوط وهو يكركر ويقول: باقي من الوقت ساعتين وأركض وأركض واوصل من الثمامة الى الجامعة في وقت قياسي وأدخل على مشخوط وهو يشوفني ويضحك ويقول : أيش فيك مهول بنفسك
قلت له :هذي عاهة على كيف كيفك يله أحذف الترم
قال : بس الحذف مخلص من خمس دقايق قعدت أترجاه عيا جيت ومسكته بيدي السليمة وسدحته على المكتب وطلعت سكين
وقلت له بتحذف لي ولا لا
قال لا ( والله أنه شجاع )
وأضرب بالسكين على المكتب ( يقالي رامبوا في الجزء الاول ) وأطلع من المكتب وادخل على عميد كليتنا واصارخ عليه وأيدي متدودلة قلت له : يا أحذف يا تعطوني سلفة عشان أتعالج قال : طيب نتفاهم (قالها بادب) يوم قالها بأدب حسيت أني المسيطر على الموقف قعدت اصارخ عليه وألج الين مادخل الامن ومسكوني وأحالوني على مجلس التأديب وقرر المجلس انه يفصلني من الجامعة فصل نهائي.
بعد ما أنفصلت قعدت في سيب الجامعة وأنا مرهق ونمت تخيلت البشكة حقت الكلية كلها جتني وتضحك قعدوا يضحكون وطلعت هالاغنية لام كلثوم
أراك عصي الحذف شيمتك الفصل
وبعدها أغنية طلال مداح
مقاريد ياقلب العنا مقاريد وش ذنبي انا
حتى أبو نورة صف ضدي وقال
العنه وشو العنه غير حذفي ودروسي وأنا
لا ومن زين الطبايع جايني رابح صقر ويقول
تحط عينك بعين عميد
تحط عينك بعين عميد
بزعمك تقدر تكاسر
بزعمك تقدر تكاسر

عشان كذا أنا من اليوم ماعادني طالب جامعي أنا انسان عادي وما أقدر أكتب مذكراتي الا في حالة تراسلون الجامعة وتطلبون منهم انهم يرجعوني .....